"Bəzi qüvvələrin Qubad İbadoğlu ətrafında yaratmaq istədikləri ajiotaj spekulyasiya cəhdindən savayı bir şey deyil.” – 7NEWS.AZ xəbər verir ki, bu fikirləri Demokratik Maarifçilik Partiyasının sədri, Milli Məclisin deputatı Elşən Musayev bildirib.

"Qubad İbadoğluna cinayət məcəlləsinin konkret maddələri üzrə ittiham irəli sürülüb. Hazırda istintaq gedir. Qarşıda isə hələ məhkəmə prosesi var. Ona görə də nəticəni bilmədən, gözləmədən hay-küy salmaq, məsələni siyasiləşdirmək yalnız və yalnız məkrli məqsədlərə hesablanıb.

Bəzən hətta xəbərlər eşidirik ki, filan konqresmen Qubadın müdafiəsinə qalxdı. Nonsensdir! Həqiqətən. Çünki Qubadı öz ölkəsindəki insanlar fərli-başlı tanımır heç. Konqresmen necə tanıdı görəsən?

Təbii, bütün bu saxta "müdafiə menyuları” hansısa mətbəxlərdə hazırlanır və Azərbaycana qarşı təzyiq vasitəsi kimi istifadə olunur. Xüsusən də indiki həssas məqamda. Amma həmin mətbəxin diletant aşpazları bir məqamı unutmasınlar: Heç bir təzyiq, heç bir şər, heç bir müdaxilə cəhdi Azərbaycanı öz prinsiplərindən döndərə, ölkəmizin "hüquqi dövlət” dəyərlərini zədələyə bilməz.

Siyasi mənsubiyyətindən asılı olmayaraq hər kəs törətdiyi cinayət əməlinə görə məsuliyyət daşıyır. Çünki qanun hamı üçün qanundur!” – deyə Partiya sədri fikirlərinə davam edib.