Diasporumuz Kiyevdə Heydər Əliyevin abidəsini ziyarət edib - FOTOLAR

Diasporumuz Kiyevdə Heydər Əliyevin abidəsini ziyarət edib - FOTOLAR
Ukraynada fəaliyyət göstərən azərbaycan diasporunun üzvləri Ulu Öndər Heydər Əliyevin Kiyev şəhərində onun adına olan parkada ucaldılan abidəsini ziyarət ediblər.

Bu barədə Ukrayna Azərbaycanlıları Birləşmiş Diasporunun (UABD) sədri, Ukrayna Azərbaycanlıları Radasının həmsədri Hikmət Cavadov məlumat verib. Hikmət Cavadov Ukrayna Azərbaycanlıları Radasının üzvlərinin hər il bütün vilayətlərdən gəlmək şərti ilə ümummilli liderin doğum günündə onun adı verilən parkda ucaldılan abidəsi önündə tədbir keçirdiklərini bildirib.

 
UABD sədri qeyd edib ki, diaspor nümayəndələri bu il Ukraynada tətbiq olunan karantin rejimilə əlaqədar Heydər Əliyevin doğum gününü geniş tədbirlərlə qeyd etmədilər: "Məlumdur ki, koronavirus pandemiyasi ilə əlaqədar Azərbaycanda olduğu kimi, Ukraynada da xüsusi karantin rejimi tətbiq olunur. Bu səbəbdən ölkə ərazisindəki bütün parklara giriş qadağan edilib. Amma buna baxmayaraq, Kiyev şəhər meriyası bizim xahişimizlə Ulu Öndər Heydər Əliyevin adına olan parkda ucaldılan abidəsini məhdud sayda insanın qısa müddətli ziyarətinə razılıq verdi. Abidənin önünə Ukrayna Azərbaycanlıları Birləşmiş Diasporu və Ukrayna Azərbaycanlıları Radasının üzvləri adından gül dəstələri qoyduq. Ölkədə xüsusi karantin qaydalarını pozmamaq üçün üzvlərin hamısı tədbirdə iştirak etməyib”.

Qeyd edək ki, Heydər Əliyevin parkdakı abidəsi diaspor nümayəndələri - Ukrayna Azərbaycanlıları Radasının həmsədri Hikmət Cavadov, onun müavini Murad Cəfərov və Ümumukrayna azərbaycanlı gənclər təşkilatının rəhbəri Damət Əskərov tərəfindən ziyarət olunub.

Xatırladaq ki, bu gün Azərbaycanda Ulu Öndər Heydər anadan olmasının 97-ci il dönümü qeyd olunur.


Xəbər lenti